الكابتن
Admin
عدد الرسائل : 693
العمر : 63
تاريخ التسجيل : 01/02/2009
 | موضوع: مختارات من شعر الأبنودي  الأحد مارس 29, 2009 3:17 pm | |
| مختارات من شعر الأبنودي من أشهر أعمال الأبنودي {يامنة }
يامنه
والله وشبت يا عبد الرُّحمان ..
عجّزت يا واد .؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان.
عشت كتير.
عشت لحد ماشفتك عجّزت يا عبد الرحمان.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمان.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو.....ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت.
طيِّب يا زمان..!!
إ
إوعى تعيش يوم واحد بعد عيالك
إوعى يا عبد الرحمان.
في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.
ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب..!!
قِدِم البيت.
اتهدت قبله بيوت وبيوت.
وأصيل هوه..
مستنيني لما أموت..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟
حاجي ياعمة وجيت..
لالقيت يامنة ولا البيت ..!!
عبد الرحمن الأبنودي
اثنان من أجمل مواويل الأبنودى
(1)
فرَّعت يا شوق عيدانك من عيون نايى
وانا باملك إيه غير موّده وحزن ونوايى
والقلب ساقية بكا.. فاضى.. وملاَّيى
وعامل إيه يا غزال ؟
صياد لفعت السهام والقوس على كتفى
شارد لقيتك.. عينيك صياد.. وبرّيه
رميتنى.. سهم العيون جاب قلبى من كتفى
واتارى للّيل قوس وسهام وكراهية
صابنى وصابك
والليل شرّانى.. وّقع منى بستانى
وقّطع الخيط وشحتر تحتى مُرجانى
نُصين بقيت يا قمر.. ومين يلضمك تانى
ومين يرَّوق عَكار الكلمة فى لسانى
ويا هل ترى تعود تجود بالوّد يا زمانى
وأقعد مع الولف أكمّل كلمتى وشايى ؟
(2)
صحت المدينة في يوم ما لقتش جناينها
القمري طار منها وغربانها جانيينها
السجن خنقه وزنقه البطن يا جنينها
قضبانه سودا وعنيدة بضي صفراوي
صفي الغناوي على الأسفلت وأنا غاوي
ما اغني غير وسط عاريينها وحافيينها
ومن بعيد القمر عوام بلا شاطي
ما دخلش شباكي ده عالي وده واطي
هوه اللي يعشق عيون بلده يصير خاطي؟
ده ان كان عشقك يا مصر خطيه ونجاسه
طين النجاسه – يا نخٌاسه – بلغ باطي
> انا المصرى....كريم العنصر
سليل المخلصين ... المؤمنين
وحامى الامه فى وقت الشدايد
وشقاق السكك للواردين
ودمى ملك ليكم اجمعين
انا المصرى كريم العنصرين
| |
|
